Fyrirtækja­þjónusta

Arion banki veitir fyrirtækjum alhliða fjármálaþjónustu. Árið var viðburðaríkt þar sem áhrif heimsfaraldurs kórónuveiru fjöruðu út en við tóku umfangsmiklar vaxtahækkanir og stríð í Evrópu með víðtækum áhrifum á rekstur og rekstrarumhverfi fyrirtækja, erlendis jafnt sem hér heima. Þjónusta bankans var umfangsmikil, hvort sem litið er til lánahliðar, fyrirtækjatrygginga eða fyrirtækjaráðgjafar.

Umsvifamikið ár að baki

Innlendur hlutabréfamarkaður hélt áfram að vaxa og dafna og voru fjórar skráningar á árinu. Að þremur þeirra hafði Arion banki aðkomu, ýmist sem leiðandi aðili eða í samstarfi við aðrar fjármálastofnanir, innlendar jafnt sem erlendar. Að auki veitti bankinn ráðgjöf og hafði aðkomu að margvíslegum öðrum verkefnum, sem meðal annars styðja við stefnu bankans á norðurslóðasvæðinu.

Eftir nokkurra ára skeið þar sem útlánavöxtur til fyrirtækja í efnahagslífinu var takmarkaður var 2022 ár umsvifa og útlánavaxtar. Arion banki veitti sem fyrr stórum og smáum fyrirtækjum hérlendis alhliða fjármálaþjónustu, hvort sem litið er til framkvæmdafjármögnunar til að mæta íbúðaþörf í landinu eða þjónustu við lítil og meðalstór fyrirtæki í sínum daglega rekstri. Þá hélt vegferð bankans innan norðurslóðasvæðisins áfram, en lán á því svæði jukust um ríflega 60% á árinu og er dreifing þeirrar lánabókar nú farin að endurspegla í æ ríkari mæli stefnu bankans á svæðinu.

Samstarf Arion banka og Varðar þegar kemur að tryggingum jókst á árinu og er nú lögð áhersla á að kynna tryggingar Varðar fyrir fyrirtækjum í viðskiptum við Arion banka. Þannig geta viðskiptavinir félaganna nálgast tryggingar Varðar bæði í gegnum þjónustuleiðir Arion banka og Varðar. Þetta er mikilvægur hluti af þeirri sýn bankans að bjóða upp á heildarþjónustu í fjármálum með það að markmiði að bæta upplifun viðskiptavina og einfalda þeim alla fjármálaumsýslu.